Билеги күчтүү жаш балбандарыбызды тосуп алуу аземи

24-августтан 3-сентябрга чейин Казакстан Республикасынын Алматы шаарында өткөрүлгөн кол күрөш боюнча дүйнө чемпионатында Таш-Көмүр шаарынан 18 спортчу катышып, алардын ичинен 5 спортчу байгелүү орундарга ээ болушту:

1.Абжалбеков Байтур 60кг өспүрүмдөр арасында оң, сол колдо 2 алтын медаль.

2.Өскөнбаев Сыймык 60кг оң колдо күмүш медаль .

3.Кыйгыров Зулумбек Гранд мастер +100 сол колдо күмүш медаль.

4.Ибрахимова Дарья 55кг өспүрүмдөр арасында сол колдо коло, оң колдо күмүш медаль.

5. Юнусова Шахзода 55кг жаштар арасында оң жана сол колдо коло медаль.

Бүгүн, 4-сентябрь күнү шаардык маданият сарайынын алдында өлкө жана шаар сыймыгы болгон билеги күчтүү балбандарды салтанаттуу тосуп алуу аземи болуп өттү. Шаар мэри К.Бектемиров, шаардык депутаттар Кеңешинин төрагасы С.Кудайбердиев, Балдар чыгармачылык үйүнүн директору М.Камчыбекова жана спортчулардын мектептеги мугалимдери куттуктоо сөзүн сүйлөп, машыктыруучусу Каныбек Эсенгелдиевге, спортчуларга өлкө намысын коргоп, мамлекеттин желегин желбиреткен жетишкендиктери үчүн ыраазычылык билдирип, дагы да ийгиликтерди каалап өтүштү.